Ostern

Bojan                          Bajass                         Rasse: Rhön Rexe

Der Bojan isch es unuffälligs Häseli gsi. Nid z gross u nid z chli, nid z mager u ou nid z rund. Sis Fäll het zwüsche grau u wiss abgwächslet u ganz vieli, chlini rötlechi Fläckli gha. Wes drum gange isch, nid eso ufzfalle, isch das e ganz e gueti Sach gsi. Het der Lehrer oder ds Mami öpper brucht und usere ganze Schar chliner Häsle dürfe ussueche, de si die grosse, die mit de länge Ohre u ou die mit em farbige Fäll ufgfalle u drum usgwählt worde. Öppe für e Ghüder veruse z tue, ga ds Wägli wüsche oder d Büecher ume richtig ids Gstell iche z tischele. Da isch der Bojan nid ufgfalle u das het ihm natürlech ganz guet passt. Mängisch isch es aber ou nid gäbig gsi, wenn me eim nid e so gseh het. Zum Bispiel, wenn am Schluss no eis Rüebli übrig gsi isch und me das het dörfe verteile. Da het sech der Bojan agwöhnt, mit allerlei Faxe uf sich ufmerksam z mache: D Ohre hingere gleit oder de grad d Ouge dermit zuedeckt, oder es ganz spitzigs Müli gmacht, oder de es unghür breits. Drum het me ihm gli einisch Bajass grüeft; das bedütet öppe soviel wie "Clown".

Hüt isch wieder e Bsuech bim Grosi nache gsi u der Bojan het sech mit allerlei Faxe grossi Müeh gä, dass ds Mami ihn usegläse het. Das Grosi isch drum scho sehr alt gsi u het nümme so tifig chönne umenang hopple. Ja u dä Spaziergang zum Grosi het der Bojan geng gärn gmacht. Ds Grosi isch drum gar es liebs Froueli gsi u het immer Fröid gha, wenn me ihns bsuecht het. Meischtens het äs ou nid alles möge frässe, wo me ihm bracht het. Als liebs Grosi hets natürlech ou nid ds früsche Rüebli sälber gässe u ds alte la stah. Ender umgekehrt: Äs het ds Lampi-Rüebli knabberet und ds knackige de dä junge Häsli übrig gla. "He, ja", hets de albe gseit, "miner Zähn si ou nümme die jüngschte u chöi sech besser dür das weiche Rüebli dürebisse, als wenn ig müessti das herte Gmües ässe."

Der Bojan het hurti sis gälbe Pellerinli agleit, isch id Stiefeli gumpet u het ds Chörbli mit de Ässware ungere Arm klemmt. So isch är tifig zum Groseli ghüpft u froh gsi, wonär ändlech acho isch. Ja, sis Pelzli isch bi däm Räge scho fei nass worde. Während ds Grosi sis zMittag mampfet, het der Bojan es heisses Tee trunke u drum ou gli wieder warm gha. De hei si zäme plouderet. Der Bojan het verzellt, wies ihm i der Schuel geit u was si deheime so mache u ds Groseli het vo früecher verzellt, wonäs no es Meitschi isch gsi. Dene Gschichte her der Bojan geng gärn zueglost. U no lieber het är d Ohre gspitzt, wenn ds Grosi vo sine Ching u vor allem vom Bojan sim Mami verzellt het. Da isch mängs z ghöre gsi, wo ds Mami allwäg sälber nie gseit hät. Alli die Gschichte het der Bojan mit ere Grimasse begleitet u ds Grosi het toll müesse lache. Dä Bsuech het am Grosi schampar fescht Freud gmacht. Irgend einisch isch es aber Zyt gsi, für wieder heizue z ga. Die beide hei sech ganz lieb vonenang verabschiedet und der Bojan het ds Chörbli gno, het siner Räge-Sache agleit und isch ganz i Gedanke dervo ghopplet.

Är het nid gmerkt, dass nach öppe drei Kurve e Fuchs uf ihn gwartet het. "Sososo" het der Fuchs gseit und isch am Bojan i Wäg gstande, dass dä nümme näbe düre chönne het. "Was bringsch du mir i dim Chörbli?" fragt ne der Fuchs. Aber das Chörbli isch halt läär gsi. "Nüt meh drinn?" Het der Fuchs gseit und ganz bös dri gluegt. "Nei, ds Groseli het alles möge ässe", het der Bojan Antwort gä. "Sososo", seit der Fuchs no einisch, "Ässe, das isch guet. Aber es läärs Chörbli, das isch gar nid guet. Gar nid guet für mi Mage, wüll dä het Hunger. Und gar nid guet für di, du chline Has, wüll jetz muess ig halt di frässe." Der Bojan het es ganz trurigs Gsicht gmacht, u nähär mit sine Ohre gwaggelet, het se hingere gleit und wieder für klappet und am Schluss fasch wie ne Propäller mit ne umegwirblet. "Sososo", seit der Fuchs und sitzt ab. "Das hani jetz no nie gseh. Chasch no meh mache mit dim Gsicht?" Der Bojan het sech Müeh gä und die verrücktischte und komischte Faxe gmacht, won är het chönne. Der Fuchs het zuegluegt und mit offenem Muul nume no gstunet, was das Bajass-Häseli da alles ufgfüehrt het. Der Bojan het bi all dene Faxe druf gluegt, dass är ganz süüferli näbenem Fuchs dürecho und am Schluss uf der richtige Syte für gäge hei zue gstande isch. Ganz am Schluss rüeft der Bojan: "So, jetz gani hingere Boum und chume de wieder füre. Nähär gits no e chlini Vorstellig - u de chasch mi de halt frässe." Der Bojan isch hingere Boum und ganz liesli e paar Meter düre Wald, nachere Kurve wieder uf e Wäg und ganz tifig hei gsprunge. Und der Fuchs? Ja, ig gloube, dä Fuchs wartet no hüt druf, dass das Häseli ändlech hingerem Boum füre chunnt und no einisch siner Faxe zeigt.