Ostern

D Waltraud isch es "Jamora"-Häseli. Die Rasse het ganz längi Haar.

D Waltraud het geng gärn zue sich sälber gluegt. Am Morge isch sie mängisch unheimelch lang im Badzimmer vor em Spiegel gstande. Vo vorne, nähär vo der linke Site u de no vo der rächte Site het sie sich agluegt. Mit em Handspiegel het sie sich ou vo hinger chönne gseh. Nähär het si dert es Haarsträndli hingere ta u amene andere Ort es paar Häärli füregstrählt.

Für nes Hasemeiteli, wo scho lang id Schuel geit, wär ja das nid eso bsunders. Aber d Waltraud geit ersch ids Spielgrüppli. D Eltere hei viel u lang mit der Waltraud gredet. Äs isch ja scho rächt, wenn es Hasemeitschi sis Fäll tuet putze. U das zringsetum und überall. Aber wäge der Frisur esone Gschicht mache, das isch übertriebe. Wenn siner Eltere albe so mit ihm gredt hei, de het d Waltraud siner Öhrli füreklappet u gar nüt wölle dervo ghöre. U wenn d Eltere chlei lüter gredt hei, de het d Waltraud eifach agfang ganz lut singe, so dass es nüt het müesse ghöre, was ihm siner Eltere hei wölle säge.

D Waltraud het no drei Brüeder gha. Die hei sech mängisch e Spass drus gmacht, sich im Badzimmer izbschliesse. U de hei si gwartet, bis d Waltraud sech het wölle schön mache. U hei natürlech d Türe nid ufta. De he d Waltraud chönne bättle, chüderle, gränne oder göisse - si hei nid ufgmacht. Speteschtens bim göisse si du der Vater oder d Mueter cho zum Rächte luege, u de hei d Buebe wohl oder übel müesse d Türe uftue. Handkerum het d Waltraud de Brüeder d Zahnbürschtli versteckt u das hei de die drei Buebe nid eso luschtig gfunde.

So si die vier Häseli vo Jahr zu Jahr grösser worde u schliesslech hei alli dörfe d Prüefig für id Oschterhase-Klass mache. Die ganzi Familie het du scho chlei gstunet, dass usgrächnet d Waltraud die schwäri Prüefig bestande het.

Die drei Buebe hei du mit der Zyt ds Gfüehl übercho, dass d Waltraud e chlei hochnäsig worde sigi wäge däm. Wenns ums Abtröchne gange isch, de het d Waltraud no müesse Ufgabe mache. Und wenn me hätti sölle der Wäg ga wüsche, de het d Waltraud sicher no müess Sport triebe. U ds Gliche isch passiert, wenn me het müesse ds Näschtli putze. Ou wenn der eltischt Brueder gseit het, das sig ou e chlei wie Sport, wenn me mit em Stoubsuger dür alli Zimmer flitzi, das het d Waltraud nid la gälte. Si het ihres schöne Sportchleidli  u die farbige Turnschueh agleit und isch eifach i Wald useghüpft.

Da hei die drei Brüeder sech einisch überleit, wie me der Waltraud am Beschte chönnti zeige, dass das Meitschi nid eifach cha mache, wienäs wott. Nach em Näschtliputze si die drei hinger ds Hüsli ghöcklet u hei das zäme besproche. Am Schluss si sie sech einig gsi, dass me der Waltraud der Haargel sötti ustusche, wo sie all Tag brucht. Zersch hei si wölle Zahnpaschta dri tue. Aber das schmöckt ganz anders, das hätti d Waltraud sofort gmerkt. Drum hei die drei Buebe beschlosse, dass si eifach es paar Salbi und süsch eso Sache vom Mami dri tüe. Am gliche Abe hei si der Haargel us der Tube use gchnüblet u statt desse allerlei Parfüm u Seife dri ta. Nähär si sie ga schlafe u hei sech uf e nächscht Morge gfröit.

Ja, am nächschte Morge het d Waltraud grad als erschti ids Badzimmer chönne, für sech ga zwäg z mache. Äs het gsunge und es Liedli pfiffe und isch fröhlech gsi. Vor der Tür si die drei Hasebuebe ghöcklet u hei gwartet, was passiert. Sie hei lang müesse warte. Sehr, sehr lang us scho fasch nümme usghalte. Wüll e kes göisse oder gränne oder schüsch öppis ussergwöhnlechs isch passiert. Uf ds Mal het sech eifach der Schlüssel dräit und use cho isch ... d Waltraud mit em ganze Fäll us Chruseli, so richtig schöni Wälle über ds ganze Gsichtli, über e Rügge, am Buch, d Arme u ou über d Bei. U das Meitschi het gstrahlet u Fröid gha u jedem vo sine drei Brüeder es Müntschi uf e Nasespitz drückt u Merci gseit. Vo da a het d Waltraud si bsundrig Name übercho: Fälli-Wälli het me ihns grüeft.