Allerlei

Dänk emal - Eiwäghändsche

Scho sit etleche Jahre brucheni für gwüssig Gartearbeite die praktische, durchsichtige  Händsche us Vinyl. Volume XL. Passt zwar nid, tönt aber viel besser als L. Äbe, e paar Greser oder Strücher si eifach z herb für miner fine Finger. De gits Usschleg oder Risse, wo schlächt verheile. Oder d Söiblueme hingerlö e chläberige, brune Saft, weme se usschriesst. Und es paar Überräschte vo Chatze-Buseli rumeni ou nid vo blosse Finger dänne. Schüsch höre miner Taupli fasch nümme uf stinke. De bin i zwüsch ine froh um die praktische Händsche. I ha gäng öppe es paar im Hosesack. Wüll de bruchese grad plötzlech hurti für öppis u nähär lang nümme. De chase wieder im Hosesack versorge.

Mit der Zyt hets mi dünkt, miner Finger sige trotzdäm chläberig-brun und Usschleg hets ou gä. Aha, hani dänkt, viellicht verrume se nid immer der glich Wäg. Drum hase agschribe und es grosses "A" (für aussen) mit schwarzem Filzstift dra gmalt. Nach e paar Tag hei miner Häng wieder Usschleg gha. Da hani gmerkt, dass das "A" vo usse u vo inne ja genau glich usgseht. Darum also - vertuscht! I ha nes paar nöii Händsche gno und das mal es grosses "I" (wie innen) häre gschriebe. Dir gloubtes nid: Chum drei Wuche speter wieder die glichi Kommedi mit mine Häng. U d Ursach allwäg identisch: Vo usse u vo inne gseht halt dä Buechstabe glich us. Ou mit emene bärndütsch "U" für usse hets nid klappet.

Mi Frou het druf abe e Lösig gha u gmeint, ig söll doch öppis Eidütigs häre schriebe. Zum Bispiel e grosse "B". Da gseht me grad uf ei Blick, wöb er der richtig Wäg steiht oder äbe lätzume. U tatsächlech, das het du ab em zwöite paar Händsche gfunktioniert. Bim erschte  hani no nid gwüsst, öb jetz der richtig Wäg für usse oder für inne steiht. Das weiss ig zwar immer no nid eidütig, aber es klappet emel.

Mis grosse Problem isch hingäge - und das besteiht immer no -, was dä "B" de ou bedütet?

10.04.2020 / Jürg Frei